ՀԷՑ-ը դատական հայցեր կներկայացնի կեղծ հոսանքազրկման տեղեկություններ տարածելու դեպքում

«Հայաստանի էլեկտրական ցանցեր» ընկերությունը հայտարարում է, որ ընտրական հաշվարկի ընթացքում որոշ լրատվամիջոցների կողմից հնարավոր կեղծ տեղեկությունների տարածման դեպքում կձեռնարկվեն դատական քայլեր։

Ընկերության ղեկավար Ռոմանոս Պետրոսյանի խոսքով՝ հատկապես այն հրապարակումները, որոնք վերաբերում են ընտրատեղամասերում ենթադրյալ հոսանքազրկումներին, կդիտարկվեն որպես կանխամտածված ապատեղեկատվություն։

«Այժմ մեր մասնագետները համացանցում իրականացնում են տվյալների հավաքագրում և համադրում իրական փաստերի ու պատկերի հետ։ Հավաքագրված և փաստաթղթավորված տվյալների հիման վրա հայց կներկայացվի առաջին ատյանի ընդհանուր իրավասության դատարան, և դրանք կներկայացվեն նաև ՀԾԿՀ-ին»,- նշել է Պետրոսյանը։

Ընկերությունից հայտնում են, որ նման դեպքերում նախատեսվում են դատական գործընթացներ՝ զրպարտանքի և կազմակերպության բարի համբավին վնաս հասցնելու հիմքով։