Հայաստանի Հանրապետությանը կվերադարձվի Գեղարքունիքի մարզի Մարտունի համայնքի «Մուշ» կինոթատրոնի շենքը

Հակակոռուպցիոն դատարանը բավարարել է Գլխավոր դատախազության պետական շահերի պաշտպանության վարչության հայցը և անվավեր ճանաչել 2006 թվականին կնքված՝ Մարտունու «Մուշ» կինոթատրոնի օտարման պայմանագիրըլ, այս մասին հայտնում են ՀՀ գլխավոր դատախազությունից։

Գլխավոր դատախազության ուսումնասիրությամբ պարզվել է, որ Գեղարքունիքի մարզի Մարտունի քաղաքի 1218 քմ մակերեսով կինոթատրոնի շենքը, 43,7 քմ ենթակայանը և 0,272 հա հողամասը օտարվել են 4 մլն 572 հազար դրամով, այն դեպքում երբ կադաստրային արժեքը կազմել է ավելի քան 33 մլն դրամ։

Ուսումնասիրությամբ նաև արձանագրվել է, որ գույքը վաճառվել է կադաստրային և շուկայական արժեքներից էականորեն ցածր գնով՝ խախտելով օրենսդրական պահանջները։

Դատարանի վճռի ուժի մեջ մտնելուց հետո գույքը՝ «Մուշ» կինոթատրոնը և հարակից տարածքները, կվերադարձվեն Հայաստանի Հանրապետությանը։