Հակակոռուպցիոն դատարանը անվավեր է ճանաչել Աբովյանի հողամասի օտարման գործարքները և որոշել վերադարձնել այն համայնքին

Հակակոռուպցիոն դատարանը բավարարել է Գլխավոր դատախազության հայցը և անվավեր ճանաչել Աբովյան համայնքի կողմից իրականացված հողամասի աճուրդը, ինչպես նաև դրա հիման վրա կնքված հետագա առուվաճառքի պայմանագրերն ու սեփականության պետական գրանցումները, այս մասին հայտնում է ՀՀ գլխավոր դատախազությունը։

Գործը վերաբերում է Ռոսիա փողոցի 1/25 հասցեում գտնվող 0.17521 հա հողամասին, որը 2016 թվականին օտարվել էր աճուրդով, ապա 2024-ին վերավաճառվել 72 միլիոն դրամով։ Դատարանի որոշման ուժի մեջ մտնելուց հետո հողամասը կվերադարձվի համայնքին։

Դատախազության տվյալներով՝ 2008–2015 թվականներին Աբովյանի նախկին քաղաքապետը և համայնքապետարանի աշխատակիցները, խախտելով օրենսդրությունը, աճուրդներով և ուղղակի վաճառքով օտարել են ավելի քան 60 հողատարածք։

Նախկին քաղաքապետին առաջադրվել են մեղադրանքներ՝ հողերի ապօրինի օտարման, պաշտոնեական կեղծիքի, փողերի լվացման և լիազորությունների չարաշահման բազմաթիվ դրվագներով։