Գրանցված արցախցի աշխատողների թիվը աճել է 4400- ով

Արցախից տեղահանված աշխատողների աշխատավարձերի և տարիքային վիճակագրությունը

Մարտի 1-ի դրությամբ գրանցված աշխատող արցախցիների ավելի քան 35 տոկոսը ստանում է մինչև 120,000 դրամ աշխատավարձ, հաղորդում է ՍիվիլՆեթը՝ հիմնվելով Պետական եկամուտների կոմիտեի տրամադրած տվյալների  հիման վրա։ Հարցման արդյունքում ներկայացվել են արցախցի աշխատողների թիվը և աշխատավարձերի չափերը՝ ըստ եկամտի սանդղակի։

Պետական եկամուտների կոմիտեի տվյալներով՝ 2023-ի սեպտեմբերյան բռնի տեղահանությունից մինչև 2026-ի մարտի 1-ը աշխատանք է գտել Արցախից տեղահանված 37,031 անձ, որոնցից մարտի 1-ի դրությամբ 24,820-ը շարունակում է աշխատել։ Մեկ տարվա ընթացքում՝ 2025-ի մարտի 1-ից մինչև 2026-ի մարտի 1-ը, աշխատողների թիվը ավելացել է 4,400-ով՝ նախորդ տարվա 20,420-ից։

Աշխատող արցախցիների աշխատավարձերի բաշխումն ըստ տոկոսային հարաբերակցության ունի հետևյալ տեսքը․

• Ավելի քան 35% ստանում է մինչև 120,000 դրամ,
• 18% ստանում է 120,000–180,000 դրամ,
• 23% ստանում է 180,000–300,000 դրամ,
• 15% ստանում է 300,000–500,000 դրամ,
• 8% ստանում է 500,000 դրամից բարձր։
   

Տարիքային տեսանկյունից, աշխատող արցախցիների մեծամասնությունը՝ ավելի քան 57%-ը, 35–62 տարեկան է, 24%-ը՝ 24–34 տարեկան, 10%-ը՝ 18–23 տարեկան, ավելի քան 8%-ը՝ 63 և բարձր, իսկ 0,43%-ը մինչև 18 տարեկան անձինք են։

Այս տվյալները ցույց են տալիս, որ աշխատող արցախցիների մեծ մասը միջին տարիքային խմբում է և հիմնականում միջին կամ ցածր աշխատավարձ է ստանում, ինչը կարևոր պատկեր է տեղահանված բնակչության տնտեսական ու սոցիալական վիճակի գնահատման համար։