Էստոնիան պատրաստ է աջակցել Հայաստանին և խորացնել համագործակցությունը․ Ցահքնա

Էստոնիայի արտաքին գործերի նախարար Մարգուս Ցահքնան հայտարարել է, որ իր երկիրը պատրաստ է աջակցել Հայաստանին և ակտիվորեն զարգացնել գործնական համագործակցությունը՝ կիսվելով սեփական փորձով և միաժամանակ սովորելով հայկական փորձից։

ՀՀ ԱԳ նախարար Արարատ Միրզոյանի հետ համատեղ ասուլիսի ընթացքում Էստոնիայի արտաքին գործերի նախարարը նշել է, որ Հայաստան կատարած իր այցը երկրորդն է նախարարի կարգավիճակում, ինչը, նրա խոսքով, վկայում է երկկողմ հարաբերությունների խորացմանն ուղղված Էստոնիայի հանձնառության մասին։

Նա անդրադարձել է նաև Հայաստանում Էստոնիայի դեսպանության բացմանը՝ ընդգծելով, որ այն ոչ միայն խորհրդանշական քայլ է, այլև ուղղված է գործնական համագործակցության զարգացմանը։

«Մենք բացեցինք մեր դեսպանությունը այստեղ՝ Հայաստանում։ Սա նպատակ ունի զարգացնելու գործնական համագործակցությունը Հայաստանի և Էստոնիայի միջև»,– նշել է նա։

Էստոնիայի ԱԳ նախարարը նաև ընդգծել է, որ Հայաստանը գտնվում է կարևոր փուլում, և իրականացվող քաղաքականությունը կարող է ազդեցություն ունենալ ոչ միայն երկրի, այլև տարածաշրջանի վրա։

Նրա խոսքով՝ Հայաստանի և Ադրբեջանի միջև խաղաղության գործընթացը չափազանց կարևոր է՝ որպես տարածաշրջանային կայունության, ինչպես նաև բիզնեսի և առևտրի զարգացման նախապայման։

«Մենք ուզում ենք աջակցել, կիսվել մեր փորձով և սովորել ձեզանից»,– հավելել է նա՝ ընդգծելով Էստոնիայի պատրաստակամությունը խորացնելու համագործակցությունը Հայաստանի հետ։