Երևանում բացվել է Իսպանիայի պատվավոր հյուպատոսություն

Երևանում հանդիսավոր պայմաններում բացվել է  Իսպանիայի Թագավորության Պատվավոր հյուպատոսություն: Այս մասին տեղեկանում ենք « Արմենպրես»-ից: 
Պատվավոր հյուպատոս Աշոտ Փարսյանը համատեղության կարգով նաև Գվատեմալայի Պատվո հյուպատոսն է Հայաստանում։Այս քայլը կնպաստի երկու երկրների միջև տնտեսական ու մշակութային կապերի ամրապնդմանը։
Իր խոսքում Աշոտ Փարսյանը նշել է.«Ձգտելու ենք բարձրացնել Իսպանիայի ճանաչելիությունը մեր երկրում՝ հանդիսանալով ինտենսիվ գործող կամուրջ երկու երկրների միջև։ Պատվո հյուպատոսությունն ունի իր նախապատմությունը։ Ես հանդիսանում եմ Հայաստանում իսպանական կենտրոնի հիմնադիր նախագահը։ Այս կառույցն ավելի քան 20 տարի ակտիվ աշխատանքներ է իրականացնում Հայաստանում՝ խորացնելով կապերն իսպանախոս աշխարհի հետ։ Մենք շարունակելու ենք նույն առաքելությունը։ Այս շենքում արդեն իսկ գործում են Cenro Hispano կենտրոնն ու գողտրիկ իսպանական ռեստորանը ավանդական ուտեստներով, հիմա դրանց միացավ նաև Պատվո հյուպատոսությունը։ Այստեղ կան նաև թանգարանային նմուշներ, որոնք այցելուներին որոշակի պատկերացում են տալիս իսպանական մշակույթի մասին։ Մեզ մոտ հաճախակի կազմակերպվում են նաև հետաքրքիր միջոցառումներ»: