Էներգետիկ անվտանգությունն արդեն դարձել է ազգային անվտանգության հարց․ Ադրբեջանի Էներգետիկայի նախարար

 Ադրբեջանի Էներգետիկայի նախարար Փերվիզ Շահբազովը Ստամբուլում կայացած II բնական պաշարների գագաթնաժողովի ժամանակ՝ անդրադառնալով տարածաշրջանային և Եվրասիական էներգետիկ կապերին ու ապագա նախագծերին  հայտարարել է, որ էներգետիկ անվտանգությունն արդեն դարձել է ազգային անվտանգության հարց, այս մասին հայտնում են ադրբեջանական ԶԼՄ–ները։

 Նա նշել է, որ 21-րդ դարում էներգետիկ ուժը կախված է ոչ միայն արտադրությունից, այլ նաև մատակարարման անվտանգությունից, կապակցվածությունից և վստահելի գործընկերությունից՝ ընդգծելով, որ հատկապես Մերձավոր Արևելքի և Եվրոպայի էներգետիկ ճգնաժամերի ֆոնին այս գործոնները դարձել են առավել կարևոր։

Շահբազովը նաև ընդգծել է, որ ապագայում Ադրբեջանի–Վրաստանի–Թուրքիայի–Բուլղարիայի էլեկտրական ինտերկոնեկտորները և այլ տարածաշրջանային կապերը կարևոր դեր կունենան էներգետիկ ինտեգրման գործընթացում։

Միաժամանակ նա ընդգծել է, որ Բաքու–Թբիլիսի–Ջեյհան նավթամուղը և Հարավային գազային միջանցքը այսօր համարվում են ամենահուսալի և կանխատեսելի նախագծերից, որոնք կապում են տարածաշրջանի երկրները և ձևավորում Եվրասիական էներգետիկ ենթակառուցվածքի առանցքային մասը։