ԵՄ և ՄԱԿ ճամփորդական փաստաթղթեր կրող պաշտոնատար անձինք առանց մուտքի վիզայի կարող են այցելել Հայաստան

Կառավարությունը սահմանել է Միավորված ազգերի կազմակերպության ճամփորդական փաստաթուղթ և Եվրոպական միության ճամփորդական փաստաթուղթ կրող անձանց համար ՀՀ առանց մուտքի վիզայի այցելությունների ռեժիմ։

Որոշման ընդունումը թույլ կտա ԵՄ և ՄԱԿ ճամփորդական փաստաթղթեր կրող պաշտոնատար անձանց՝ առանց ՀՀ մուտքի վիզայի այցելել և գտնվել ՀՀ տարածքում առավելագույնը 180 օր ժամկետով՝ մեկ տարվա ընթացքում:

Ըստ հիմնավորման՝ 2025 թ. հուլիսի 1-ից ՀՀ մուտքի վիզայի պահանջից ազատվել են աշխարհի 116 երկրների այն քաղաքացիները, ովքեր ունեն հետևյալ երկրների կացության կարգավիճակ.

• Ամերիկայի Միացյալ Նահանգներ

• Եվրոպական միության և Շենգենյան համաձայնագրի երկրներ

• Արաբական Միացյալ Էմիրություններ

• Բահրեյնի Թագավորություն

• Կատարի Պետություն

• Սաուդյան Արաբիայի Թագավորություն

• Քուվեյթի Պետություն

• Օմանի Սուլթանություն

Նշված անձանց կացության կարգավիճակի վավերականությունը ՀՀ մուտք գործելու օրվանից պետք է լինի առնվազն վեց ամիս: