Էլեկտրաէներգետիկական շուկայի ազատականացումը ոլորտի ամենաարմատական բարեփոխումն է 2004-ից ի վեր. ՀԾԿՀ նախագահ

 2022 թվականի փետրվարի 1-ից Հայաստանում ներդրված էլեկտրաէներգետիկական շուկայի ազատականացման բարեփոխումն ամենաարմատականն է ոլորտում 2004 թվականից ի վեր իրականացված փոփոխություններից հետո։ Ազգային ժողովում Հանրային ծառայությունները կարգավորող հանձնաժողովի (ՀԾԿՀ) նախորդ տարվա գործունեության մասին հաղորդման ներկայացման ժամանակ այս մասին հայտարարել է ՀԾԿՀ նախագահ Մեսրոպ Մեսրոպյանը:

Հանձնաժողովի ղեկավարի փոխանցմամբ՝ նոր համակարգի ներդրումից չորս տարի անց էլեկտրաէներգետիկական համակարգում արդեն նկատելի են դրական տեղաշարժեր։

«Շուկայի մեկնարկից 4 տարի անց էլեկտրաէներգետիկական համակարգում մենաշնորհը մրցակցությամբ փոխարինելու արդյունքում շուկայի ազատականացված հատվածում ձեռք բերվող էլեկտրական էներգիայի մասնաբաժինն էականորեն ավելացել է»,- ընդգծել է Մեսրոպյանը:

Անդրադառնալով գազամատակարարման ոլորտին՝ ՀԾԿՀ նախագահը նշել է, որ հաշվետու տարում վերանայվել են բնական գազի փոխադրման, գազամատակարարման համակարգի օպերատորի ծառայության մատուցման և բնական գազի բաշխման սակագները:

Չնայած ներքին ենթակառուցվածքային սակագների այս վերանայումներին՝ շարքային քաղաքացիների համար գնային փոփոխություններ չեն եղել։

«Միևնույն ժամանակ, սպառողներին վաճառվող բնական գազի սակագների փոփոխության անհրաժեշտություն չի առաջացել, և դրանք մնացել են անփոփոխ»,- հայտնել է Մեսրոպ Մեսրոպյանը։