COP17-ի նախապատրաստական աշխատանքներ. ԲՏԱ և Շրջակա միջավայրի նախարարությունները քննարկել են համագործակցության ուղղությունները

ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանն ընդունել է Շրջակա միջավայրի նախարարի տեղակալ Արամ Մեյմարյանին։ Հանդիպումը կայացել է ընթացիկ տարվա հոկտեմբերի 19-30-ը Հայաստանում անցկացվելիք ՄԱԿ-ի «Կենսաբանական բազմազանության մասին» կոնվենցիայի կողմերի 17-րդ համաժողովի (COP17) կազմակերպչական աշխատանքների շրջանակում։

Որպես COP17-ի միջգերատեսչական աշխատանքային խմբի անդամ՝ ԲՏԱ նախարարությունը համակարգում է միջոցառման ընթացքում տեխնոլոգիական նորարարությունների, կիրառական գիտական լուծումների և ոլորտի ներուժի պատշաճ ներկայացումը։

Քննարկման ընթացքում կողմերը մտքեր են փոխանակել համաժողովի առաջնահերթությունների, ազգային տաղավարի տեխնոլոգիական ձևաչափի և հարակից միջոցառումների շուրջ։ Առանձնահատուկ ուշադրություն է դարձվել հետևյալ հարցերին.

• Պատվիրակությունների համար կապի և հեռահաղորդակցության անխափան աշխատանքի ապահովում,
• Թվային ենթակառուցվածքների պատրաստվածություն,
• Անհրաժեշտ տեխնոլոգիական լուծումների ներդրում։

Գևորգ Մանթաշյանն ընդգծել է, որ COP17-ը Հայաստանի համար կարևոր հարթակ է ոչ միայն միջազգային բարձր մակարդակի միջոցառում հյուրընկալելու, այլև երկրի գիտատեխնիկական ներուժը ներկայացնելու և կիրառական գիտության ոլորտում նոր ներդրումներ ներգրավելու տեսանկյունից։

Հանդիպման ավարտին փոխնախարարները հստակեցրել են համատեղ աշխատանքի հետագա քայլերն ու ժամկետները՝ պայմանավորվելով շարունակել համակարգված փոխգործակցությունը համաժողովն արդյունավետ կազմակերպելու նպատակով։