Բարբուշատի թունելի կառուցումը նոր փուլ է Հյուսիս-հարավ ծրագրի համար․ Փաշինյան

Վարչապետ Նիկոլ Փաշինյանը Ֆրանսիայի նախագահ Էմանուել Մակրոնի հետ համատեղ հայտարարության ընթացքում անդրադարձել է Հյուսիս-հարավ ավտոճանապարհի շրջանակում Բարբուշատի թունելի կառուցման վերաբերյալ ձեռք բերված պայմանավորվածությանը։

«Ուզում եմ հատկապես ընդգծել Հյուսիս-հարավ ավտոճանապարհի՝ Բարբուշատի թունելի կառուցման վերաբերյալ ձեռք բերված պայմանավորվածությունը և համաձայնությունը: Սա մի նոր փուլ է ոչ միայն Հյուսիս-հարավ ճանապարհի կառուցման համար, այլև ճանապարհաշինության ոլորտում նոր որակի ստանդարտ սահմանելու ճանապարհին»,– նշել է վարչապետը։

Նրա խոսքով՝ ծրագրի իրականացման համար անհրաժեշտ են համապատասխան կարողություններ և փորձ ունեցող ընկերություններ, և այդ նպատակով ներգրավվել են ֆրանսիական շինարարական կազմակերպություններ։

Փաշինյանը նաև նշել է, որ մինչ փաստաթղթի ստորագրումը տեղեկացրել է նախագահ Մակրոնին ծրագրի մասին, և նրա աջակցությամբ այն դարձել է իրականություն։

«Սա մեր երկրում իրականացվող սուպերնախագծերից մեկն է՝ Հյուսիս-հարավ ավտոճանապարհի կառուցումը»,– ասել է վարչապետը՝ ընդգծելով, որ խոսքը ճանապարհի ամենաբարդ հատվածներից մեկի մասին է, որի իրականացման համար պահանջվում են հատուկ հմտություններ։

 «Ինչպես բազմաթիվ նման դեպքերում, Ֆրանսիան և նախագահ Մակրոնը կանգնեցին Հայաստանի կողքին: Մենք այսօր կարող ենք ասել, որ Հյուսիս-հարավ հսկայական նախագիծը, սուպերնախագիծն արդեն իսկ միս ու արյուն է ստանում: Մենք արդեն պատկերացնում ենք, թե ինչ քայլերով ենք այդ ճանապարհն ամբողջությամբ շահագործման հանձնելու»,– ասել է Փաշինյանը։