Բաքվից՝ ուղերձ Թուրքիային․ «Ադրբեջանը աշխարհիկ, իրավական պետություն է»

Ադրբեջանի իշխանություններին մոտ կանգնած լրագրող Ազիզ Ալիբեյլին արձագանքել է Թուրքիայի նախագահ Ռեջեփ Թայիփ Էրդողանի գլխավոր խորհրդական Օքթայ Սարալի պաշտոնից հեռանալուն՝ հայտարարելով, որ Ադրբեջանի դպրոցական կանոնները պետք է որոշվեն Բաքվում, այլ ոչ թե Թուրքիայի պաշտոնյաների կողմից։

Նշենք, որ Թուրքիայի նախագահի գլխավոր խորհրդական Օքթայ Սարալի պաշտոնից հեռանալը տեղի է ունեցել Ադրբեջանի դպրոցներում գլխաշոր կրելու սահմանափակումների շուրջ առաջացած տարաձայնությունների ֆոնին։

Հոկտեմբերի 12-ին Սարալը քննադատել էր Ադրբեջանում գլխաշոր կրող աշակերտուհիների կրթության իրավունքի սահմանափակումը՝ հայտարարելով, որ անընդունելի է կրոնական համոզմունքների պատճառով աշակերտներին դպրոց չթույլատրելը։

Նրա հայտարարությունը դժգոհություն էր առաջացրել Ադրբեջանում, որտեղ Թուրքիայի պաշտոնյայի խոսքերը գնահատվել էին որպես երկրի ներքին գործերին միջամտություն։

Հոկտեմբերի 25-ին Սարալը լրագրող Թալաթ Աթիլլային հայտնել էր, որ հեռացել է պաշտոնից Թուրքիայի նախագահ Ռեջեփ Թայիփ Էրդողանի հրահանգով։ Հարցին՝ արդյոք այդ որոշումը կապված էր Ադրբեջանի վերաբերյալ իր հայտարարությունների հետ, նա պատասխանել էր. «Այո՛, այդպես է թվում»։

Հոկտեմբերի 26-ին Սարալն արդեն հրապարակայնորեն հայտարարել է, որ հրաժարականի դիմում է ներկայացրել։ Նա նաև ընդգծել է, որ պաշտոնից հեռանալը չի նշանակում հրաժարվել իր համոզմունքներից կամ Էրդողանին աջակցելուց։

Այսպիսով, Սարալի պաշտոնից հեռանալու հանգամանքների վերաբերյալ նրա հայտարարությունները տարբեր ձևակերպումներ են ունեցել։ Մինչդեռ Ադրբեջանի պահանջով նրան պաշտոնանկ անելու մասին տեղեկությունները շրջանառվել են լրատվամիջոցներում։

Հիշեցնենք, որ Ադրբեջանում դպրոցական հագուստի կանոնների կիրառման շուրջ քննարկումները սրվել էին այն բանից հետո, երբ տեղեկություններ էին տարածվել գլխաշոր կրող աշակերտուհիներին դպրոց չթույլատրելու դեպքերի մասին։

Դպրոցական հագուստի կանոններով սահմանափակվում է համազգեստին չհամապատասխանող լրացուցիչ հագուստի օգտագործումը։ Թեև կանոններում գլխաշորի ուղղակի արգելք նշված չէ, դրանց կիրառման շուրջ դժգոհություններ են առաջացել։

Օքթայ Սարալը հրապարակայնորեն քննադատել էր այդ իրավիճակը՝ պաշտպանելով գլխաշոր կրող աշակերտուհիների կրթության իրավունքը։

Դրան հաջորդել էին հրապարակումներ այն մասին, որ Բաքուն Անկարայից պահանջել է միջոցներ ձեռնարկել Սարալի նկատմամբ։