Բաքուն ԱԳՆ է հրավիրել եվրոպական դեսպաններին՝ արցախահայության վերադարձի կոչից հետո

Ապրիլի 20-ին Ադրբեջանի Հանրապետությունում Բելգիայի Թագավորության դեսպան Ժյուլյեն դե Ֆրեպոնը և Նիդեռլանդների Թագավորության դեսպան Մարիան դե Յոնգը առանձին-առանձին հրավիրվել են Արտաքին գործերի նախարարություն։

Ինչպես հայտնում է Ադրբեջանի ԱԳՆ մամուլի ծառայությունը, Ադրբեջանը բողոք է հայտնել երկու երկրների դեսպաններին՝ կապված Բելգիայի և Նիդեռլանդների խորհրդարաններում ընդունված փաստաթղթերի հետ։ Բաքուն դրանք գնահատում է որպես «անարդար և կողմնակալ նախաձեռնություններ», որոնք, ըստ ադրբեջանական կողմի, ուղղված են Ադրբեջանի ինքնիշխանությանն ու տարածքային ամբողջականությանը վնասելուն, ինչպես նաև Հայաստան-Ադրբեջան խաղաղ գործընթացին խոչընդոտելուն։

Արտաքին գործերի նախարարությունում ընդգծվել է, որ «փաստաթղթերում տեղ գտած հայտարարությունները հիմնված են կեղծ և անհիմն գնահատականների վրա» և, ըստ Բաքվի, հակասում են միջազգային իրավունքին։

Բացի այդ, ադրբեջանական կողմը կտրականապես մերժել է բոլոր մեղադրանքները, այդ թվում՝ տարածքային ամբողջականության, ինչպես նաև հայկական ծագում ունեցող անձանց իրավունքների և կալանավորումների վերաբերյալ պնդումները։

Դեսպաններին կոչ է արվել իրենց հերթին քայլեր ձեռնարկել՝ կանխելու նման նախաձեռնությունները իրենց երկրների խորհրդարաններում, որոնք կարող են վնասել երկկողմ հարաբերություններին։

Հիշեցնենք, որ օրեր առաջ Բելգիայի Դաշնային խորհրդարանը կոչ էր արել ապահովել արցախահայության վերադարձի իրավունքը։