Այստեղ ենք այնքան, ինչքան ՀՀ իշխանությունը ցանկանա․ Դավիթ Իշխանյանի ուղերձը Բաքվի բանտից

Ադրբեջանում 15 տարվանից մինչև ցմահ ազատազրկման դատապարտված հայ գերիների, այդ թվում՝ Արցախի ԱԺ նախկին նախագահ Դավիթ Իշխանյանի պաշտպանական կողմը մինչ օրս չի ստացել դատավճռի ամբողջական տարբերակն ու մեղադրական ակտը։

Ընտանիքի միջոցով հղված ուղերձում այս մասին հայտնել է ինքը՝ Իշխանյանը։ Նրա փոխանցմամբ՝ երեկ Բաքվի վերաքննիչ դատարանում կայացել է գործով նախնական նիստը (բուն դատական գործընթացը նշանակված է հունիսի 2-ին), որի ժամանակ դատարանը մերժել է փաստաթղթերի ամբողջական փաթեթը տրամադրելու միջնորդությունը։

«Ակնհայտ է՝ ովքեր ծանոթանան մեղադրական ակտին, կհասկանան, թե արդար ու թափանցիկ դատավարության հետ ինչ աստիճանի կապ չունի տեղի ունեցածը։ Սա ամբողջությամբ գրաքննվող, վերահսկողության տակ գտնվող հաշվեհարդարի դատավարություն է», — նշել է Արցախի խորհրդարանի նախկին ղեկավարը։

Բացի այդ, դատարանը մերժել է Իշխանյանի ևս երկու միջնորդություն.

• Առաջինը՝ դատավարությունը բաց կազմակերպելու և օնլայն հեռարձակում ապահովելու վերաբերյալ,

• Երկրորդը՝ ապատեղեկատվություն տարածող ադրբեջանական պետական «Azertag» լրատվամիջոցի մուտքը դատարան արգելելու մասին։

Իշխանյանի փոխանցմամբ՝ նիստի ընթացքում ադրբեջանցի պաշտպաններից մեկը նույնիսկ չի հանդուրժել տեղի ունեցողն ու բացականչել է. «Մենք մեր սերունդների առջև ամաչելու ենք այսպիսի դատավարություն կազմակերպելու համար»։

«Ընդհանուր առմամբ, դա տրագիկոմեդիա է։ Ֆրանց Կաֆկան կերազեր ներկա գտնվել այս դատավարությանը. դա ներշնչանք կլիներ, որ նա գրեր իր «Դատավարություն» ստեղծագործության երկրորդ բաժինը», — ասված է ուղերձում։