Առողջության համընդհանուր ապահովագրության ներդրման վերաբերյալ հարցերին է անդրադարձել Հայաստանի առողջապահության նախարար Անահիտ Ավանեսյանը

Առողջության համընդհանուր ապահովագրության ներդրման վերաբերյալ հարցերին է անդրադարձել Հայաստանի առողջապահության նախարար Անահիտ Ավանեսյանը։

Նա նշել է, որ  համակարգի ներդրման առաջին ամիսներին բուժաշխատողների համար նոր կարգը որոշակիորեն անսովոր էր, և ժամանակ էր պահանջվել, որպեսզի նրանք ամբողջությամբ հարմարվեին ապահովագրական համակարգի պահանջներին և պատշաճ կերպով գրանցեին մատուցված ծառայությունները։ 

Նա հավելել է, որ այս պահին արդեն աշխատավարձերի մասով բավարար աճ են արձանագրում։ Միայն առողջության համընդհանուր ապահովագրության ներդրման արդյունքում առաջնային օղակում աշխատավարձերը միջինում աճել են 30-40 տոկոսով։

Ավանեսյանի խոսքով՝ կան նաև առանձին ամբուլատորիաներ, որոնք նախկինում կուտակված ֆինանսական պարտավորությունների պատճառով դեռևս բախվում են որոշակի դժվարությունների։

«Համակարգն անցել է արդյունքային վարձատրության սկզբունքին, այսինքն` մասնագետի վարձատրությունն անմիջականորեն կախված է նրա կողմից սպասարկված պացիենտների թվից։ Եթե նեղ մասնագետը օրվա ընթացքում պացիենտների չի սպասարկում, դա կազդի նրա աշխատավարձի վրա։ Միաժամանակ ունենք բարձր ծանրաբեռնվածությամբ մասնագետներ, որոնց վարձատրությունը մի քանի անգամ աճել է։ Կան նաև պոլիկլինիկական օղակի մասնագետներ, որոնց ամսական աշխատավարձը գերազանցում է 1 միլիոն դրամը»,- ասել է նախարար Ավանեսյանը։