Առաջարկվում է ընդլայնել ներքին ազդարարման իրավասու մարմինների շրջանակը՝ ներառելով 50 և ավելի աշխատակից ունեցող մասնավոր ոլորտի կազմակերպությունները

Հայաստանի խորհրդարանն առաջին ընթերցմամբ քննարկել է ««Ազդարարման համակարգի մասին» օրենքում փոփոխություններ և լրացումներ կատարելու մասին» օրենքի նախագիծն ու կից ներկայացված օրենսդրական փաթեթը:

Այս բարեփոխումների առանցքային նպատակն է բարձրացնել երկրում ազդարարման համակարգի արդյունավետությունը, ապահովել դրա ինստիտուցիոնալ ու գործնական կատարելագործումը, ինչպես նաև պատշաճ կերպով կատարել Հայաստանի ստանձնած միջազգային հակակոռուպցիոն պարտավորությունները:

ԱԺ հերթական նիստում փաթեթը ներկայացրել է ՀՀ արդարադատության նախարարի տեղակալ Գևորգ Քոչարյանը: Նոր կարգավորումներով առաջարկվում է արմատապես ընդլայնել ներքին ազդարարման իրավասու մարմինների և կազմակերպությունների շրջանակը:

«Այսուհետ ներքին ազդարարման համակարգեր ներդնելու պարտավորությունը կտարածվի նաև մասնավոր ոլորտի այն կազմակերպությունների վրա, որոնք ունեն 50 և ավելի աշխատակից»,- նշել է փոխնախարարը:

Բացի այդ, ընդլայնվում է նաև հենց «ազդարարում» հասկացության բովանդակությունը: Օրենսդրական փոփոխությամբ առաջարկվում է դրանում ներառել նաև փողերի լվացմանը և ահաբեկչության ֆինանսավորմանն առնչվող հնարավոր իրավախախտումների վերաբերյալ հաղորդումները:

Ըստ հիմնական զեկուցողի՝ նախագծով հստակ պահանջ է սահմանվում, որ ներքին ազդարարման իրավասու մարմիններն ու մասնավոր ընկերությունները պետք է ստեղծեն հատուկ, վստահելի ուղիներ և ընթացակարգեր: Դրանք պետք է բացառեն տեղեկատվության արտահոսքը՝ երաշխավորելով.

1. Ազդարարի անձնական տվյալների գաղտնիության լիարժեք պահպանումը,

2. Ստացված հաղորդումների օբյեկտիվ, անկողմնակալ և պատշաճ քննությունը:

Նախագծերի փաթեթի ընդունումը սոսկ ներքին նախաձեռնություն չէ. այն բխում է Հայաստանի Հանրապետության մի շարք ռազմավարական փաստաթղթերից և միջազգային պարտավորություններից: Մասնավորապես, այն հանդիսանում է հետևյալ ծրագրերի բաղկացուցիչ մասը.

• ՀՀ 2023-2026 թվականների հակակոռուպցիոն ռազմավարություն և դրա իրականացման գործողությունների ծրագիր,

• Տնտեսական համագործակցության և զարգացման կազմակերպության (ՏՀԶԿ) հակակոռուպցիոն ցանցի Ստամբուլյան գործողությունների ծրագրի Հայաստանի 5-րդ փուլի գնահատման զեկույց,

• Կոռուպցիայի դեմ պայքարող պետությունների խմբի (ԳՐԵԿՈ)՝ Հայաստանի գնահատման 5-րդ փուլի զեկույցով ստանձնած հանձնառություններ:

Խորհրդարանական քննարկման ընթացքում գլխադասային՝ Պետական-իրավական հարցերի մշտական հանձնաժողովի դրական եզրակացությունը ներկայացրել է հանձնաժողովի անդամ Լիլիթ Մինասյանը՝ գործընկերներին առաջարկելով կողմ քվեարկել նախագծին: