Անհայտ կորած անձանց իրավունքներին առնչվող հարցերը պետք է մշտապես պետության ուշադրության կենտրոնում լինեն. ՄԻՊ

ՀՀ մարդու իրավունքների պաշտպան (ՄԻՊ) Անահիտ Մանասյանը մայիսի 29-ին հերթական հանդիպումն է ունեցել անհայտ կորած անձանց հարազատների հետ։ Այս մասին տեղեկացնում են ՄԻՊ աշխատակազմից:

Հանդիպմանը, որի ընթացքում քննարկվել են անհայտ կորած անձանց և նրանց ընտանիքների իրավունքների պաշտպանությանը վերաբերող խնդիրներ, մասնակցել են նաև քաղաքացիական հասարակության և միջազգային կազմակերպությունների ներկայացուցիչներ։

Հանդիպման ընթացքում հարազատները տեղեկացրել են կարևոր նախաձեռնության՝ Անհայտ կորած անձանց հարազատների համահայկական ասոցիացիայի հիմնադրման մասին։

Անահիտ Մանասյանը բարձր է գնահատել այս քայլը՝ ընդգծելով, որ ասոցիացիայի ստեղծումը ծանրակշիռ խթան կհանդիսանա անհայտ կորած անձանց և նրանց ընտանիքների իրավունքների հասցեավորման գործում։

Մարդու իրավունքների պաշտպանը վերահաստատել է իր հանձնառությունը՝ նշելով, որ այս խնդրի պատշաճ հասցեագրումն իր գործունեության առանցքային առաջնահերթություններից է։

«Այս անձանց իրավունքներին առնչվող հարցերը պետք է մշտապես պետության ուշադրության կենտրոնում լինեն, և պետք է շարունակական քայլեր ձեռնարկվեն նրանց իրավունքների երաշխավորումն ապահովելու ուղղությամբ»,- ընդգծել է Անահիտ Մանասյանը:

Այս համատեքստում ՄԻՊ-ը հավելել է, որ ներկայումս ակտիվ աշխատանքներ են տարվում ինչպես ներպետական, այնպես էլ միջազգային մեխանիզմների շրջանակներում՝ կիրառելով իրավական ու մարդասիրական բոլոր հնարավոր գործիքները։