ԱԳՆ–ն ուզում է հավասարեցնել Հայաստանում և արտերկրում ծառայող դիվանագետների աշխատավարձերը

Օտարերկրյա պետություններում դիվանագիտական ծառայության գրավչությունը բարձրացնելու համար ՀՀ ԱԳՆ-ն որոշել է վերանայել աշխատավարձերը։ Գերատեսչության ղեկավար Արարատ Միրզոյանն այսօր ԱԺ-ում ներկայացրեց «Դիվանագիտական ծառայության մասին» ՀՀ օրենքում փոփոխություններ կատարելու մասին նախագիծը, որով նախատեսվում է լավարկել դիվանագետների վարձատրությունը։

 

Միրզոյանը նշեց՝ ԱԳՆ–ի` Երևանում աշխատող դիվանագետների աշխատավարձը կարգավորվում է օրենքով, իսկ օտարերկրյա պետությունում աշխատողների դեպքում գործում է կառավարության որոշումը։ Արդյունքում կա բավականին մեծ տարբերություն նրանց աշխատավարձերի միջև, օրինակ` Երևանում աշխատող առաջին քարտուղարը ստանում է 267–366 հազար դրամ, իսկ արտերկրում աշխատողը` մոտ 157–178 հազար։