«Ագարակ» պետական անցման կետում կանխվել է ծխախոտի խոշոր խմբաքանակի ներմուծման փորձը

ՀՀ պետական եկամուտների կոմիտեն շարունակում է հետևողական պայքարը ստվերային տնտեսության, հարկերից խուսափելու և մաքսային իրավախախտումների դեմ՝ կանխելով հարկային չարաշահումները, որոնք վնասում են պետության և օրինապահ գործարար համայնքի շահերը։

 Ինչպես հայտնում են ՀՀ Պետական եկամուտների կոմիտեից օրերս Իրանի Իսլամական Հանրապետությունից «Ագարակ»  մաքսային անցման կետ ժամանած բեռնատարի նկատմամբ իրականացվել է մաքսային զննություն։ Ռենտգեն զննման սարքավորման միջոցով ստացված պատկերների ուսումնասիրության արդյունքում մաքսային ծառայողների մոտ կասկած է առաջացել, որ բեռնատարում կարող է լինել չհայտարարագրված ծխախոտային արտադրանք։

Կատարված մանրակրկիտ զննության ընթացքում, տարբեր թաքստոցներից՝ այդ թվում վարորդի գլխավերևի դարակներից, կցորդիչի պահեստամասերի համար նախատեսված պահոցներից և բեռնատարի ներքնակից, հայտնաբերվել է 18,520 տուփ չհայտարարագրված ծխախոտային արտադրանք՝ տարբեր գրառումներով։

Չհայտարարագրված ապրանքների ներմուծման փորձը կանխվել է, իսկ հայտնաբերված ծխախոտները՝ առգրավվել։

ՀՀ քաղաքացի Է.Վ.-ի նկատմամբ կազմվել է մաքսային կանոնների խախտման վերաբերյալ արձանագրություն՝ «Մաքսային կարգավորման մասին» օրենքի համապատասխան հոդվածի հատկանիշներով։ Դեպքի առնչությամբ նյութերն ուղարկվել են հետագա ընթացքն ապահովելու համար։

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։