Ադրբեջանի հրեական համայնքները Քնեսեթին հորդորել են չաջակցել Հայոց ցեղասպանության ճանաչմանը

Ադրբեջանում գործող երեք հրեական համայնքների ղեկավարները դիմել են Քնեսեթին՝ հորդորելով չաջակցել Հայոց ցեղասպանության ճանաչմանը։

Ինչպես հայտնում են ադրբեջանական ԶԼՄ–ները, Բաքվի լեռնային հրեաների համայնքի նախագահ Միլիխ Եվդաևի, Բաքվի աշկենազի հրեաների համայնքի նախագահ Ալեքսանդր Շարովսկու և Բաքվի սեֆարդական հրեաների համայնքի նախագահ Զամիր Իսաևի ստորագրած դիմումում ասված է, որ նախաձեռնությունը բացասաբար կազդի Հարավային Կովկասում ձևավորվող խաղաղության և կայունության գործընթացի վրա։

Փաստաթղթում նշվում է, որ որոշումը որևէ օգուտ չի բերի Իսրայելին և չի ծառայի խաղաղության նպատակներին։