ԱԱԾ տնօրենի գլխավորությամբ քննարկվել են անհայտ կորած անձանց վերաբերող նոր օրենքի կիրառման և հանձնաժողովի անելիքները

ՀՀ ազգային անվտանգության ծառայության տնօրեն Ա. Սիմոնյանի գլխավորությամբ այսօր՝ հունիսի 22-ին, տեղի է ունեցել Գերիների, պատանդների և անհայտ կորած (գտնվելու վայրն անհայտ) անձանց հարցերով զբաղվող միջգերատեսչական հանձնաժողովի հերթական նիստը։ Այս մասին հայտնում են ՀՀ ԱԱԾ մամուլի կենտրոնից։

Հանձնաժողովի նախագահ Ա. Սիմոնյանը բացման խոսքում ամփոփել է նախորդ նիստի ընթացքում արձանագրված հիմնական խնդիրների լուծման ընթացքը և ներկայացրել տրված հանձնարարականների կատարման արդյունքները։

Նիստի օրակարգի առանցքային թեմաներից է եղել 2026 թվականի մայիսի 1-ից ուժի մեջ մտած «Ռազմական գործողությունների հետևանքով ստեղծված պայմաններում և հանգամանքներում անհայտ կորած անձանց մասին» ՀՀ օրենքը։ Ընդգծվել է այս օրենսդրական իրավակարգավորումների կարևորությունը խնդիրների համակարգային կարգավորման տեսանկյունից, ինչպես նաև քննարկվել են օրենքի լիարժեք կիրարկմանն ուղղված կազմակերպչական հիմնական միջոցառումները։

Հանդիպման ընթացքում մասնակիցներն անդրադարձել են նաև տարբեր պետական մարմինների և շահագրգիռ կառույցների միջև աշխատանքների համակարգման արդյունավետության բարձրացմանը:

Քննարկումների արդյունքում կայացվել են համապատասխան որոշումներ, տրվել են նոր հանձնարարականներ և սահմանվել հետագա աշխատանքների կազմակերպման հիմնական ուղղությունները։