34 կրտսեր պարեկ մասնակցել է առաջխաղացման հարցազրույցի. ՆԳՆ-ն ներդնում է գնահատման նոր մեխանիզմներ

Ներքին գործերի նախարարությունը, առաջնորդվելով թափանցիկության, անաչառության և արժանիքահեն կառավարման սկզբունքներով, շարունակում է կատարելագործել ծառայողների առաջխաղացման և մասնագիտական գնահատման մեխանիզմները։ Գերատեսչությունից հայտնում են, որ նպատակը համակարգում հավասար հնարավորությունների և մրցակցային միջավայրի ապահովումն է։

ՆԳՆ ոստիկանության պետ, նախարարի տեղակալ Կամո Ցուցուլյանի հրամանով ձևավորվել է խորհրդատվական կարծիք տրամադրող հանձնաժողով։ Դրա առաքելությունն է ստուգել Պարեկային ծառայության կրտսեր պարեկի պաշտոնից առաջխաղացման ներկայացված ծառայողների մասնագիտական կարողություններն ու հնարավորությունները։

1. Հանձնաժողովը ձևավորում է խորհրդատվական կարծիք:

2. Դրա հիման վրա Պարեկային ծառայության պետը համապատասխան առաջարկություն է ներկայացնում Ոստիկանության պետին:

Հունիսի 30-ին կայացած հարցազրույցին մասնակցել է Պարեկային ծառայության Երևան քաղաքի և մարզային ստորաբաժանումների 34 կրտսեր պարեկ։

Ներքին գործերի նախարարի օգնական Արթուր Խուդինյանի նախագահած հանձնաժողովի կազմում ընդգրկված են եղել.

• ՆԳ նախարարության ներկայացուցիչներ,

• Միջազգային գործընկերներ,

• Հասարակական կազմակերպությունների (ՀԿ) ներկայացուցիչներ։

Խորհրդատվական կարծիքը ձևավորելիս հանձնաժողովը հաշվի է առել մի շարք առանցքային գործոններ.

• Կրտսեր պարեկների կատարողական ցուցանիշները,

• Ստացած խրախուսանքները,

• Կարգապահական տույժերի վերաբերյալ տվյալները,

• Առաջխաղացման տեսանկյունից նշանակություն ունեցող այլ հանգամանքներ։

Նախարարությունից վստահեցնում են, որ այս մոտեցումը էապես կնպաստի համակարգում արժանիքների վրա հիմնված առաջխաղացման մշակույթի ամրապնդմանն ու ծառայողների մասնագիտական աճի խթանմանը։