2018-2025 թվականներին Հայաստանի իրական ՀՆԱ-ն աճել է 53 տոկոսով

Հայաստանի իշխանությունները պլանավորում են առաջիկա տարիներին ՀՆԱ–ի միջին տարեկան աճն ապահովել առնվազն 6%, հայտարարել է ՀՀ վարչապետ Նիկոլ Փաշինյանը: Այս մասին վարչապետը խոսել է, երբ ներկայացրել է «Քաղաքացիական պայմանագիր» կուսակցության նախընտրական ծրագիրը։

«2021-2026 թվականների ծրագրում մենք խոստացել էինք տարեկան միջինը 7% տնտեսական աճ, և մենք այդ ցուցանիշն ապահովել ենք ավելի քան 7%․ 7․6% միջինում տնտեսական աճ ենք ապահովել։ Առաջիկա տարիներին մենք պլանավորում ենք առնվազն միջինում 6% աճ», - ասել է Փաշինյանը։

Անդրադարձ կատարելով 2018-2025 թվականներին,Փաշինյանը նշել է, որ այդ ժամանակահատվածում Հայաստանի իրական ՀՆԱ-ն աճել է 53 տոկոսով։

2026 թվականի պետական բյուջեում Հայաստանի տնտեսության աճը նախատեսված է 5,4% չափով: